EDITO - HAR/FAR n°42 - La Revista de l'Occitània qui bolèga
Que vivèm ua epòca en la quau lo des-heitisme e l'agrèr que hén domaus deus grans. Servit per la màger part deus mèdias, que pòrtan los pòbles d'Euròpa, sia a deishar càder l'espèr de cambiament e lo combat politic, sia a acceptar los partits dits "de govèrn" per solucion ineluctabla. Daubuns que contunhan de vòtar per personas qui flatejan los instincts los mei maishants, quitament se cambian de camps tà las eleccions seguentas. Hòrt d'autes que desertan tot simplament las urnas e que s'embarran dens l'individualisme neurit per la societat de consum. Daubuns totun, ne deishan pas càder e qu'ensajan de bastir alternativas suus lòcs on se troban, lo lor vilatge o lo lor barri. Qu'arrefusèssen l'alternativa electorau o pas, tots e totas que saben qu'ei en préner en mans la loa existéncia, collectivament, que la solucion e's tròba. Uei lo dia, vertat qu'ei, l'alternativa globau qu'ei de bastir, mes ne cau pas desbrombat que l'accion locau shens l'accion e la pensada globau, que demora ua carrèra bòrnha en la quau ne'ns devem pas embarrar. Lo movement occitan dens lo son ensem que coneish la medisha situacion. Arrecentrats en la construcccion deus mejans indispensables tà la subervita de la cultura nosta e de la nosta existéncia de pòble se medish de la fin de las annadas 70 e la debuta de 80 enlà, los militants e las militantas occitanas qu'an uei lo dia de bastir l'alternativa sociau occitana. Que devem bastir las organizacions politicas e sindicalas nostas. Que devem ganhar los drets nostes de pòble entà autodeterminà's. De pensar per doman, que sia dab lo federalisme o la separacion deus Estats francés, espanhòu o italian. Qu'ei l'objectiu d'AAP. Pas dens un esperit egoïste, mes dens la solidaritat dab los autes pòbles d'Euròpa purmèr, e deu monde tanben. Non se podem pas decidir ad aqueth òrdi mondiau miat peus Estats occidentaus gavidats peus Estats Units e qui pòrtan lo planèta tota de cap tà la soa pèrta. Juntatz-nos ! Que volem bastir un movement lo mei orizontau possible. Causa mauaisida tant lo monde qu'ei desacostumat a préner las causas en las soas mans pròpias. N'avèm pas de solucions totas prèstas. Au contra, qu'avèm principis aus quaus èm hòrt estacats : qu'em occitan o que demoram en Occitània. Qu'arrefusam la division enter las poblacions espleitadas, tribalhadors, paisans o shens emplecs d'aqueth país. Entà nosautes la solidaritat qu'ei sancèra dab los e las que s'escapan deu lor país pr'amor de rasons economicas o politicas. Qu'èm partisan de la libertat de circulacion e qu'arrefusam la ierarquia enter las personas. Mes qu'èm shens illusion cap aus pretenduts "ben-hèits" deu capitalisme que daubuns apèran pudicament "l'economia de mercat". Que volem víver e decidir au país, mestrejar las vitas nostas e caminar, tostemps, de cap tà l'emancipacion nosta, collectiva e tanben individuau.
